हेटौंडा । तेस्रो बागमती प्रदेश खेलकुद प्रतियोगिताको उपाधि काठमाडौंले जितेको छ । बागमती प्रदेश खेलकुद विकास परिषद्को आयोजनामा असार १ गतेदेखि सुरु भइ असार ३ गते औपचारिक उद्घाटन गरिएको प्रतियोगितामा काठमाडौंले सर्वाधिक ५१ स्वर्ण, ३८ रजत र ४२ कास्य गरी कुल १ सय ३१ पदक जित्दै च्याम्पियन बनेको हो ।
प्रतियोगिताको अन्तिम दिन मंगलबार फुटबलका फाइनल खेल सम्पन्न भएसँगै गौरीटार फुटबल मैदानमा समापन तथा पुरस्कार वितरण समारोह गरिएको थियो । प्रतियोगितामा ललितपुरले पनि काठमाडौं बराबर कुल १ सय ३१ पदक जिते पनि स्वर्ण पदक कम हुँदा दोस्रो स्थानमा सीमित भयो । ललितपुरले ४६ स्वर्ण, ४१ रजत र ४४ कास्य पदक जितेको छ । चितवन ३० स्वर्ण, २८ रजत र २७ कास्य गरी कुल ८५ पदकसहित तेस्रो भएको छ । प्रथम भएको काठमाडौंले नगद १ लाख, दोस्रो भएको ललितपुरले ७५ हजार र तेस्रो भएको चितवनले ५० हजारसहित ट्रफी प्राप्त गरेका छन् ।
प्रतियोगिताको अन्तिम दिन फुटबलतर्फ पुरुष र महिलाको फाइनल खेल भएको थियो । पुरुषतर्फको उपाधि चितवनले जितेको छ भने महिलातर्फ काठमाडौं च्याम्पियन बनेको छ । मंगलबार हेटौंडा—५ स्थित पिप्ले रंगशालामा भएको महिलातर्फको फाइनलमा काठमाडौंले चितवनलाई १—० गोलअन्तरले पराजित गर्दै उपाधि जितेको हो । उपाधि विजेता काठमाडौंका खेलाडीहरुले जनही ५ हजार र उपविजेता चितवनका खेलाडीहरुले जनही ४ हजार प्राप्त गरे ।
महिलातर्फ काठमाडौंकी मनिषा आलेमगर प्रतियोगिताकी उत्कृष्ट खेलाडी घोषित भइन् । उनले नगद २० हजार प्राप्त गरिन् । काठमाडौंकै झरना नगरकोटी उत्कृष्ट गोलकिपर, सजिता कोइराला उत्कृष्ट डिफेन्डर र देवेन्द्रजंग शाही उत्कृष्ट प्रशिक्षक घोषित भए । चितवनकी सुशीला केसी उत्कृष्ट मिडफिल्डर र प्रतीक्षा ठकुरी उत्कृष्ट फरवार्ड घोषित भएका छन् ।
पुरुषतर्फको फाइनलमा चितवनले मकवानपुरलाई टाइब्रेकरमा पराजित गर्दै उपाधि जित्यो । निर्धारित समयको खेल २—२ गोलको बराबरीमा सकिएपछि खेल टाइब्रेकरमा पुगेको थियो । टाइब्रेकरमा चितवनले मकवानपुरलाई ३—१ गोलअन्तरले हराएको हो । पुरुषतर्फ मकवानपुरका अभिषेक भोलन प्रतियोगिताको उत्कृष्ट खेलाडी घोषित भए । उनले नगद २० हजार प्राप्त गरे । चितवनका मनोज गुरुङ उत्कृष्ट गोलकिपर, विकल तामाङ उत्कृष्ट डिफेन्डर, सलिल ढकाल उत्कृष्ट फरवार्ड र सुमन श्रेष्ठ उत्कृष्ट प्रशिक्षक घोषित भए । मकवानपुरका सुजन गुरुङ उत्कृष्ट मिडफिल्डर घोषित भए ।
अन्तिम पदक तालिकाअनुसार काभ्रेपलाञ्चोक २२ स्वर्ण, १८ रजत र १८ कास्य गरी ५८ पदकसहित चौथो स्थानमा रह्यो । भक्तपुरले १७ स्वर्ण, २२ रजत र ३६ कास्य गरी ७५ पदक, मकवानपुरले ११ स्वर्ण, १० रजत र ३२ कास्य गरी ५३ पदक, सिन्धुपाल्चोकले १० स्वर्ण, ११ रजत र १० कास्य गरी ३१ पदक, नुवाकोटले ९ स्वर्ण, १३ रजत र २० कास्य गरी ४२ पदक, धादिङले ९ स्वर्ण, १० रजत र २१ कास्य गरी ४० पदक जितेका छन् । रामेछापले ८ स्वर्ण, ३ रजत र २१ कास्य, सिन्धुलीले २ स्वर्ण, ११ रजत र २२ कास्य, रसुवाले २ स्वर्ण, ७ रजत र ४ कास्य तथा दोलखाले १ स्वर्ण, ३ रजत र १४ कास्य पदक जितेका छन् ।
प्रतियोगितामा बागमती प्रदेशका १३ वटै जिल्लाको सहभागिता थियो । १५ खेल विधामा २ सय १७ स्वर्ण, २१ सय ४ रजत र ३ सय ११ कास्य गरी कुल ७ सय ४४ पदकका लागि खेलाडीहरुले प्रतिस्पर्धा गरेका थिए । प्रतियोगितामा १ हजार ५ सय १५ पुरुष र १ हजार १ सय ९२ महिला गरी कुल २ हजार ७ सय ७ खेलाडी सहभागी थिए । प्रतियोगिताका खेलहरु हेटौंडा, चितवन, ललितपुर र काठमाडौंका विभिन्न खेलस्थलमा सञ्चालन गरिएको थियो ।
समापन समारोह बागमती प्रदेशकी युवा तथा खेलकुद मन्त्री उर्मिला नेपालको प्रमुख आतिथ्यतामा भएको हो । मन्त्री नेपालले प्रदेश सरकारले खेलकुद नीति निर्माणको काम अघि बढाएको बताइन् । प्रदेशलाई खेलकुदमैत्री बनाउने, नयाँ प्रतिभा पहिचान गर्ने र खेलाडीलाई अन्तर्राष्ट्रियस्तरमा प्रतिस्पर्धा गर्न सक्षम बनाउने प्रदेश सरकारको लक्ष्य रहेको उनको भनाइ थियो ।
पर्याप्त पूर्वाधार नहुँदा खेलाडीले आफ्नो प्रतिभा प्रस्तुत गर्न समस्या भोग्नुपरेको भन्दै उनले खेलकुद पूर्वाधार विकासलाई मन्त्रालयले प्राथमिकतामा राखेको बताइन् ।
