मकवानपुर। मकवानपुरको भीमफेदी गाउँपालिका-२ स्थित टौवासमा शनिबार दिउँसो राप्ति खोलामा नुहाउने क्रममा पानीको भेलले बगाउँदा एक जनाको ज्यान गएको छ। ज्यान गुमाउने व्यक्ति पर्सा जिल्ला अन्तर्गत वीरगञ्ज महानगरपालिका-५ निवासी करिब ४५ वर्षीय पुरुषोत्तम शर्मा रहेको प्रहरीले पुष्टि गरेको छ।
शर्मा शनिबार दिउँसो साथीहरुसँग नुहाउन खोलामा गएका थिए। उनीहरू रमाइलो गरिरहेका बेला एक्कासी आएको तीव्र भेलले उनलाई बगाएको बताइएको छ। खोलामा आएको आकस्मिक भेलले सम्हालिन नपाउँदै उनलाई बगाएपछि घटनास्थलमा रहेका अन्य व्यक्तिहरूले तत्काल खबर गरे पनि उद्धार सम्भव भएन।
घटनापछि खोजतलास गर्दा शर्माको शव घटनास्थलदेखि करिब ४०० मिटर तल फेला परेको थियो। खबर पाएपछि जिल्ला प्रहरी कार्यालय मकवानपुरबाट खटिएको प्रहरी निरीक्षकको टोली घटनास्थल पुगेको थियो र घटनाबारे आवश्यक अनुसन्धानको प्रक्रिया अगाडि बढाइएको मकवानपुर प्रहरीका प्रवक्ता प्रहरी नायब उपरीक्षक (डीएसपी) श्यामु अर्यालले जानकारी दिए ।
खोलामा नुहाउने क्रममा वर्षायाममा आउने आकस्मिक भेलका कारण यस्तो दुर्घटना भएको प्रारम्भिक अनुसन्धानबाट थाहा भएको छ। प्रहरीका अनुसार घटनाको विस्तृत विवरण संकलन तथा अनुसन्धान कार्य जारी छ। यस दुर्घटनाले वर्षायाममा नदी तथा खोलामा सावधानीपूर्वक नुहाउने वा प्रवेश नगर्न सम्बन्धित निकायले आग्रह गर्दै आएको चेतावनीलाई फेरि एकपटक स्मरण गराएको छ।
