मकवानपुर । मकवानपुरको हेटौंडामा देवरले आफ्नै भाउजुको हत्या गरेको दुःखद् खबर छ । प्रहरीका अनुसार हेटौडा उपमहानगरपालिका वडा नम्बर–१ चौकीटोल बस्ने ३५ को गुडिया दासलाइ आफ्नै देवर राहुल भनिने रमेश दासले खुकुरी प्रहार गरी हत्या गरेका हुन् ।
आफ्नै घरको माथिल्लो तलाको कोठामा टाउकोमा चोट लागी मृत अवस्थामा रहेको भन्ने खबर प्रहरीलाइ आएपछि त्यहाँ पुग्दा जेठी भाउजुलाई देवरले हत्या गरेको अवस्थामा प्रहरीले फेला पारेको हो । घरायसी विषयमा विवाद हुँदा देवरले खुकुरी प्रहार गरी हत्या गरेको अनुसन्धानका क्रममा पत्ता लागेको मकवानपुरका प्रहरी नायब उपरिक्षक श्यामु अर्यालले जनाए ।
रमेशले आफ्नै माइलो दाजु २८ वर्षिय रुपेश दासलाई टाउको, दाहिने हात, करङको भागमा खुकरी प्रहार गरी गम्भिर घाईते बनाएको प्रहरीको भनाई छ । प्रहरीले रमेशलाई खुकुरीसहित नियन्त्रणमा लिएको छ । प्रहरीका अनुसार घाइते दासको हेटौंडास्थित सहकारी अस्पतालमा उपचार भइरहेको छ ।
तीन दाजुभाइमध्ये जेठो रोशन रोजगारीको सिलसिलामा ५ महिनाअघि कतार गएका थिए । हत्या गरिएकी गुडिया ३ सन्तानकी आमा हुन् । प्रहरीले घटनाबारे बुधबार राति ९ बजे थाहा पाएको हो । यस्तो घटना किन र कसरी भयो भन्ने विषयमा आफूहरुले अनुसन्धान गरिरहेको प्रहरीले जनाएको छ ।
