मनिता राना 
हेटौंडा/पर्सा राष्ट्रिय निकुञ्जमा पाटेबाघको संख्या बढेसँगै संरक्षण व्यवस्थापनलाई अन्तर्राष्ट्रिय मापदण्डअनुकूल बनाउन बाघ संरक्षणका लागि सुनिश्चित व्यवस्थापन अन्तर्राष्ट्रिय मापदण्ड (सीएटीएस) प्रमाणीकरण प्रक्रिया सुरु भएको छ ।
सन् २०२२ मा ४१ वयस्क बाघ रहेको पर्सा निकुञ्जमा सन् २०२६ को गणनाअनुसार बाघको संख्या ७१ पुगेपछि संरक्षण उपलब्धिलाई दीर्घकालीन र गुणस्तरीय व्यवस्थापनमा रुपान्तरण गर्न सीएटीएस प्रक्रिया अघि बढाइएको हो । अब दर्ता, स्वमूल्यांकन, सुधार योजना निर्माण, अनुपालनसम्बन्धि दस्तावेज तयारी, राष्ट्रिय समीक्षा, स्वतन्त्र मूल्यांकन तथा अन्तर्राष्ट्रिय निर्णयसम्मको प्रक्रिया अघि बढाइनेछ ।
यस क्रममा राष्ट्रिय निकुञ्ज तथा वन्यजन्तु संरक्षण विभागको आयोजनामा पर्सा राष्ट्रिय निकुञ्जमा सम्पन्न सीएटीएस कार्यशालामा विभागका वरिष्ठ इकोलोजिष्ट हरिभद्र आचार्य, निकुञ्जका प्रमुख संरक्षण अधिकृत रामचन्द्र खतिवडा, जेड्एसएल नेपाल, मध्यवर्ती क्षेत्र व्यवस्थापन समिति, सुरक्षा निकाय, निकुञ्जका कर्मचारी, उपभोक्ता समिति तथा स्थानीय सरोकारवालाको सहभागिता थियो । कार्यशालामा सीएटीएसको प्रारम्भिक तयारी, स्वमूल्यांकन, व्यवस्थापन सुधार, प्रमाण संकलन तथा सरोकारवालाबीच समन्वयका विषयमा छलफल भएको पर्सा राष्ट्रिय निकुञ्जका प्रमुख संरक्षण अधिकृत खतिवडाले जानकारी दिए ।
कार्यशालामा वरिष्ठ इकोलोजिष्ट आचार्यले बाघको संख्या बढ्नुमात्र पर्याप्त नभइ त्यसलाई दीर्घकालसम्म टिकाइराख्न बासस्थान, आहार, सुरक्षा तथा समग्र व्यवस्थापनको गुणस्तरमा निरन्तर सुधार आवश्यक रहेको बताए । उनले सीएटीएसले बाघको संख्यामात्र नभइ बाघ संरक्षणका लागि आवश्यक समग्र व्यवस्थापन प्रणालीलाई अन्तर्राष्ट्रिय मापदण्डका आधारमा मूल्यांकन गर्ने भएकाले पर्साका लागि यो महत्वपूर्ण अवसर भएको बताए ।
निकुञ्जका प्रमुख संरक्षण अधिकृत खतिवडाले सन् २०२२ देखि २०२६ सम्म पर्सामा बाघको संख्या ४१ बाट बढेर ७१ पुग्नु संरक्षणको महत्वपूर्ण उपलब्धि भए पनि अबको चुनौती बाघस“गै स्थानीय समुदायलाई सुरक्षित राख्नु रहेको बताए । उनले संरक्षणबाट स्थानीय समुदायले प्रत्यक्ष लाभ पाउने वातावरण निर्माण गर्न आवश्यक रहेको उल्लेख गरे । उनका अनुसार निकुञ्जको बाघमित्र अभियानलाई सीएटीएस प्रक्रियास“ग जोडेर मानव–बाघ सहअस्तित्व, समुदायको सुरक्षा, सचेतना तथा सहभागितालाई थप प्रभावकारी बनाउन सकिन्छ ।
कार्यशालामा सहभागी सरोकारवालाले सीएटीएसलाई निकुञ्जले प्रमाणपत्र प्राप्त गर्ने प्रक्रियाका रुपमा मात्र नभइ निकुञ्ज, मध्यवर्ती क्षेत्र, सुरक्षा निकाय, संरक्षण साझेदार तथा स्थानीय समुदायको साझा अभियानका रुपमा अघि बढाउनुपर्नेमा जोड दिएका थिए । सीएटीएसले बाघको संख्यामात्र नभइ बासस्थान, आहार, सुरक्षा, व्यवस्थापन, वैज्ञानिक अनुगमन, समुदायको सहभागिता, मानव–बाघ द्वन्द्व, पर्यटन तथा बाघको दीर्घकालीन अवस्थालगायत विषयको समग्र मूल्यांकन गर्नेछ ।
यस क्रममा बासस्थान तथा आहार संरक्षण, चोरीशिकार नियन्त्रण, स्मार्ट पेट्रोलिङ, मानव–बाघ द्वन्द्व व्यवस्थापन, वैज्ञानिक अनुगमन तथा समुदाय सहभागितालाई प्राथमिकता दिइने प्रमुख संरक्षण अधिकृत खतिवडाको भनाइ छ । बाघको संख्या बढ्दै गएको अवस्थामा सीएटीएस प्रमाणीकरण प्रक्रियाले पर्सा राष्ट्रिय निकुञ्जको संरक्षण व्यवस्थापनलाई थप वैज्ञानिक, व्यवस्थित र अन्तर्राष्ट्रिय मापदण्डअनुकूल बनाउन सहयोग पुग्ने अपेक्षा गरिएको छ । संरक्षणको सफलता प्रमाणपत्र प्राप्त गर्नुमा मात्र नभइ बाघ सुरक्षित, वनक्षेत्र स्वस्थ्य तथा स्थानीय समुदाय सुरक्षित र संरक्षणका सक्रिय साझेदार बन्नुमा निर्भर रहने उनले बताए ।
