काठमाडौँ । ईस्लाम धर्मावलम्बीको महत्वपूर्ण पर्व ईद (ईद उल फित्र) सोमबार देशभर मुस्लिम समुदायले मनाएको छ ।
नमाज पढेर खुसी साटासाट गर्दै यो पर्व मनाइएको हो । यो पर्व उनीहरु एक महिनाको ब्रत (रोजा) बस्न तथा दान दक्षिणा दिन सफल भएको खुसियालीमा मनाउने गर्दछन् ।
‘ईद’ को अर्थ खुसी साटासाट गर्नु हो । एकाबिहानै नुहाइधुवाइ गरेर खुला स्थान वा नजिकको मस्जिदमा गएर नमाज पढ्ने गरिन्छ । यसपछि परिवारजन तथा साथीभाईसँग भेटघाट गरेर खुसी साटासाट गर्ने गरिन्छ ।
यो पर्व मनाउनका लागि सरकारले सार्वजनिक बिदा समेत दिएको थियो । यस पर्वका अवसरमा देशका विशीष्ट व्यक्तिले शुभकामना सन्देश व्यक्त गरेका थिए ।