खबरदारी 
काठमाडौं । संघीय राजधानी काठमाडौँमा शुक्रबार गणतन्त्रवादी र राजावादीले प्रदर्शन गर्दैछन् ।
प्रदर्शनका लागि गणतन्त्रवादीहरूका लागि भृकुटीमण्डप र राजावादीहरूका लागि तीनकुने तोकिएको छ । गणतन्त्रवादीको प्रदर्शनमा समाजवादी मोर्चामा आबद्ध नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपा छन् । समाजवादी मोर्चाले बबरमहलबाट माइतीघर र त्रिपुरेश्वर हुँदै प्रदर्शनीमार्गसम्म जुलुस निकाल्ने गरी रुट तय गरेको छ ।
सभाअघि बबरमहल, कुपण्डोल, त्रिपुरेश्वर चोक, सुन्धारा, न्युरोड, सोह्रखुट्टे, शान्तिबाटिका, मैतीदेवीबाट जुलुस निकालिने तयारी छ । समाजवादी मोर्चाको जुलुस भृकुटीमण्डपमा पुगेर दिउँसो १ बजे सभामा परिणत हुने जनाइएको छ ।
यस्तै, राजसंस्था पुनःस्र्थापनाको माग राख्दै राजावादीको रिङरोड बाहिर गरिने प्रदर्शनमा मेडिकल व्यवसायी दुर्गा प्रसाईले नेतृत्व गर्नेछन् । यसमा नवराज सुवेदी नेतृत्वको राजसंस्था पुनःस्र्थापनाका लागि संयुक्त जनआन्दोलन समिति पनि मिसिएको छ ।
गणतन्त्रवादी र राजावादी दुवैको प्रदर्शन एकैदिन हुने भएकाले सरकारले सुरक्षा व्यवस्था कडा पार्ने भएको छ । नेपाल प्रहरीका केन्द्रीय प्रवक्ता प्रहरी नायब महानिरीक्षक दिनेशकुमार आचार्यका अनुसार, काठमाडौंमा शुक्रबार २५ सयभन्दा बढी प्रहरी परिचालन गरिनेछ ।
यस्तै, ट्राफीक व्यवस्थापनमा समस्या हुने भएकाले एक हजार ८०० ट्राफिक प्रहरी खटाइने तय भएको छ ।
