काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङलाई सरकारले पदमुक्त गरेको छ ।
सोमबार साँझको मन्त्रिपरिषद् बैठकले घिसिङलाई पदबाट हटाउने निर्णय गरेको हो । घिसिङलाई पदबाट हटाउन पटक-पटक स्पष्टीष्करणसमेत सोधिएको थियो । उद्योगीहरुले तिर्नुपर्ने करोडौं बक्यौता रकम उठाउन खोज्दा घिसिङविरुद्ध सरकार र उद्योगीहरु लागेको बताइएको छ ।
उर्जामन्त्री दीपक खड्काले पनि अब लोडसेडिङ हुन सक्ने बताएका थिए । सरकारले आफूलाई पदमुक्त गर्दा कुलमान भने मकवानपुरको विकट क्षेत्र राक्सिराङ गाउँपालिकाको खैराङमा बिजुली उद्घाटनमा थिए । चेपाङ बस्ती रहेको दुर्गम क्षेत्रमा बिजुलीबत्ती व्यवस्था भएपछिको खुशीयाली मनाइँदा कुलमान बर्खास्त भए ।
नेपाल विद्युत् प्राधिकरणको चेपाङलाई बिजुली कार्यक्रम राक्सिराङको ८ वटै वडामा विद्युतियकरण घोषणा पछि उद्घाटनका लागि कुलमान पुगेका थिए ।
कुलमानलाई हटाएर सरकारले प्राधिकरणको कार्यकारी निर्देशकमा हितेन्द्रदेव शाक्य नियुक्त गरेको छ । उर्जा मन्त्रालयको सिफारिशमा शाक्यलाई कार्यकारी निर्देशकमा नियुक्त गरिएको बताइएको छ ।
आफूलाई अन्यायपूर्ण ढंगबाट हटाइएको भन्दै कुलमान भने सरकारको निर्णयविरुद्ध अदालत जाने भएका छन् । मन्त्रिपरिषद्को निर्णयपत्र पाएपछि आफू अदालत जाने उनले बताएको बुझिएको छ ।
